...........

يوم أنا طالب هقيت إني عرفت

كل مافي الكون من سر الحياة


يوم أنا طالب تحمّست ووعدت

إني أصلح ما تبيّن لي خطاه


يوم أنا طالب على الغيمة رسَمت

ضحكة الدنيا على عذب الشفاة


يوم أنا طالب تخيّلت وحَلمت

إني ألبس من هَدب شمسي عباه

يوم أنا طالب حَسبت إني وصلت

أثرني ما دست بالرجل الوطاه


وانتهى ربيع الأحلام وظهرت

أصدم الواقع ويصدمنى عطاه


ينجرح شوف العيون الى التفت

كن في حجر العيون أكبر قذاه


إن بغيت أمشي لقيت إنّي وقفت

وإن رفعت الصوت ما جاني صداه


الحقايق فاجأتني ما بدأت

والزمان أسرع من اللي في رجاه


وانكسر غصن الخيال اللي زرعت

والتوى صدري على تسعين آهـ


لكن إني رغم هذا ما انهزمت

واستمريت أدعس الشوك بحفاه


كلما زادت مواجيعي صبرت

بين ثلج وبين جمرات الغضاه


ما غلبت الوقت لكن ما انغلبت

أعتصر نبعي من بطون الصفاه


كلها لعيون معشوقن عشقت

ديرتي ديرة رفيعين الجباه


في ثراها غالي أحبابي دفنت

وفي سماها أجمع الحلم وهواه



كلمات صاحب السمو الملكي الأمير / خالد الفيصل (دايم السيف)